Kva gjer forliksrådet?
Forliksrådet blir gjerne omtalt som "folkets eigne domstol".
Alle kommunar har eit forliksråd. Det består av tre valde medlemmer og like mange varamedlemmer som kommunestyret vel for fire år av gongen (ny periode blir 2025–2028). Forliksråda er ein del av rettssystemet, og hovudregelen er at det ikkje er høve til få sivile saker behandla i tingretten før saka er prøvd løyst i forliksrådet. I 2017 avlasta forliksrådet resten av rettssystemet med over 77 000 saker.
Normalt består forliksråda berre av lekfolk. Det er forliksrådet si oppgåve å finna ei minneleg løysing mellom partane. Det er inga plikt til å bli bistått av advokat i saker for forliksrådet.
Dersom ein part i ei sak for forliksrådet ikkje har høve til å møta sjølv, kan vedkommande velja å la seg representera av ein av dei tre møtefullmektigane. Den møtefullmektige møter på vegner av parten, og har fullmakt til å godta eit eventuelt forlik på vegner av parten. Parten og den møtefullmektige har dialog seg imellom før møtet i forliksrådet.
Les meir om forliksrådet sitt arbeid på Samarbeidsutvalet for forliksråd og namsmenn si nettside og hos Regjeringa.
Kven kan vera forliksrådsmedlem?
Krava til kven som kan veljast til forliksrådsmedlem følger av domstolloven §§ 53 og 56. Ein må:
- vera norsk statsborgar,
- ikkje vera frådømt røysteretten i offentlege saker,
- ikkje vera under offentleg gjeldsforhandling eller konkursbehandling, eller vera i konkurskarantene,
- vera over 25 år og under 70 år,
- beherska norsk munnleg og skriftleg godt,
- elles vera personleg eigna til oppgåva.
Ein bør òg vera busett i Sveio kommune.
Domstolloven § 71 avgrensar nokon yrkesgrupper frå å vera forliksrådsmedlemmer, som dommarar, praktiserande advokatar og tilsette i politiet. Domstolloven § 72 avgrensar dei med ein viss vandel frå å vera forliksrådsmedlemmer, bl.a. dei som er idømd ubetinga fengselsstraff i meir enn eitt år.
For møtefullmektigar er det berre krav om at ein må vera over 25 år, ha alminneleg god samfunnsmessig kunnskap og beherska skriftleg og munnleg norsk godt.
Melda inn kandidatar
Er du interessert, eller vil foreslå ein eller fleire kandidatar, kan du senda ein e-post til politisk sekretær i Sveio kommune på bjarte.stolas.storli@sveio.kommune.no.
Dersom du vil foreslå kandidatar, hugs å først få deira samtykke.